فوائد تأخر الجواز ...اه والله تصدقوا طلع له فوائد

الجزء الثاني



المشاكل الزوجيه

متخافوش مش هيكون في مشاكل لأننا اصلاً اللي هيشغلنا اكبر من المشاكل الزوجيه

 طلوع المعاش وإننا ندور على تربه ندفن فيها

مفيش وقت اصلاً

حتى لو في مشاكل متخافوش بردوا اصلها مش هتقعد كتير

يعني تخيلوا واحده إتجوزت وهى 20 سنه ومثلا مكتوبلها إنها تموت وهى 60 سنه وعندها مشاكل

 يبقى عاشت 40 سنه في مشاكل

إحنا بقى ما شاء الله علينا كل ما بنكبر كل ما بنقلل المده دي

الطبخ

إحنا خلاص بقينا طباخين

ما هو مش معقول كل السنين دي ومبنعرفش نطبخ

مش زي البنات الوحشين خالص اللي اتجوزوا بدري قبل ما يتعلموا الطبيخ

تقديس الحياه الزوجيه

طبعا أي بنت اتجوزت وهى صغيره ممكن الشيطان يلعب في مخها وتفضل تعيش في مشاكل مع جوزها وتطلق في الاخر وهى حاطه في دماغها إنها صغيره ولسه الفرص كتير قدامها

إحنا بقى الغلابه لا

تلاقينا بنقدس اوي الحياه الزوجيه ونستحمل ونستحمل لغاية لما نطق وبردوا نستحمل 

ما إحنا جبناه بعد شوق يبقى مش بسهوله نستغنى عنه

تنظيم النسل

يعني إحنا ربنا يقدرنا يارب ونلحق نجيب حتة عيل

 مش زي البنات الوحشين خالص اللي بيجيبوا عيل واتنين وتلاته



الحريه في كل شئ

النت

تقعدي على النت براحتك وفي أي وقت إنتي عايزاه

لكن البنات الوحشيين خالص اللي اتجوزوا بدري تلاقوا اجوازهم في حاجه بتقرصهم اول ما يلاقوهم قاعدين على النت وتلاقيه بيطلب طلبات غريبه
 
عايز اكل ) طيب ما انت لسه واكل )
 
عايز شاي ( ما الكوبايه انتي لسه مخلصها )
 
قومي إكويلي لبس

ولما تسأله

ليه هتخرج ؟؟؟؟؟؟؟؟؟

يرد عليها والشر طالع من عينيه

 قلتلك قومي وخلاص انتي هتفتحيلي تحقيق
 
ولو رفضت يبقى يوم مش معدي عليها 

يا يطلع غله في الكمبيوتر و يقفله وتكون بتكتب حاجه مهمه فيبوظ شغلها
 
يا يكسره وتكون هى اصلا اللي شرياه ما هو مش هيخسر حاجه
 
يا يقوم يكسرها هى شخصياً

الأخطاء
 
بمعنى تغلطي براحتك

 ( صفوا نيتكم انا اقصد خير طبعا)
 
يعني لو بتعملي اكل وباظ مفيش مشكله

إيه يعني
 
يا هتاكليه 

يا هترميه

لكن البنات الوحشيين خالص اللي اتجوزوا بدري لو بوظوا اكل تلاقي جوزها فتح الموشح المعتاد
 
انتي خايبه ومتنفعيش تكوني ست بيت

انا هروح اكل عند امي

ويحسسك ان مامته الشيف شربيني ويكون اصلاً اكلها القطط تقرف تاكله
 
لو مثلا غلطتي وانتي بتغسلي وحطيتي لبس وخرط على اللبس التاني والالوان باظت

مفيش مشكله عادي يترمي وتجيبي واحد تاني

لكن البنات الوحشيين خالص اللي اتجوزوا بدري لو عملوا كده تلاقوا اجوازهم يحسسوكي انك عملتي كارثه

ويقولك
 
ايه يا هانم اللي انتي عملتيه ده
اخرج انا ازاي دلوقتي

 )ال يعني معندهوش غيره)

انتي عارفه القميص اللي بوظتيه ده بكام

)وهو اصلا عم عبده البواب يقرف يلبسه)

التعب

وانا عمري ما بنسى جملة ماما اللي دايما تقولها

انا من ساعة ما اتجوزت مش عارفه اتعب زي بقية الناس براحتي
 
صح ما هي مهما ياعيني بتكون تعبانه بردوا بتشتغل في البيت

يعني انا ممكن ارجع من الشغل تعبانه الاقي الاكل موجود ربنا يخليها ماما

حتى لو بابا بس اللي موجود وشافني تعبانه تلاقيني صعبانه عليه ويقولي خليكي انتي انا اللي هعملك الاكل

لكن البنات الوحشيين خالص اللي اتجوزوا بدري لو رجعوا من الشغل مثلا تعبانين

تلاقوا اجوازهم اول ما يشفوهم يبتدوا الموشح

انا مليش دعوه بشغلك لو تعبانه اقعدي في البيت هو انا يعني باخد ايه من شغلك
 
وتلاقي اصلا مرتبها هو اللي ماشي بيه البيت

بس المهم يثبت نفسه وخلاص

ولو غلطت ونامت من التعب

تلاقيه بيقومها من عز النوم ويقولها

 قومي يا هانم نايمه ليه

تقوله

 تعبانه
 
 يقولها

 طبعا ما هو التعب ليا انا بس لكن في الشغل بتكوني قرد

) هو انت يا ابن الحلال كنت معاها وشفتها زي القرده)

ولو بيمسك اعصابه تلاقيه يطلع غله في اي حاجه
 
يرزع الباب قوي

يقفل باب الدولاب جامد

يفتح النور

يكسر كوبايه
 
يتعمد يتكلم في الموبايل فوق راسها

المهم يزعجها وخلاص

بتكوني جمعيه خيريه بكل فروعها

ازاي؟؟؟؟؟؟؟؟؟ هقولكم

فرع رعاية الأطفال

يعني كل ما واحده من عيلتك تولد وعايزه حد يراعي اطفالها مش هتلاقي غيرك

ما انتي فاضيه مش وراكي حاجه

يعني انا عن نفسي ولاد اخواتي اتعلمت فيهم كل حاجه قبل امهاتهم كمان

يعني بعرف اغيرلهم واسكتهم والاعبهم من قبل ما امهاتهم يشيلوهم حتى

فبتاخدي شرف المركز الاول في رعاية الأطفال في عيلتك

فرع رعاية المسنين

بما ان مفيش غيرك مع والدك ووالدتك يبقى انتي اكيد اللي هتراعيهم

هو انا اه دلوقتي ماما اللي بتعمل الاكل لغاية لما باجي من الشغل

وبابا ساعات الاقيه داخل عليا بكوباية شاي بالليل لو كنت سهرانه

بس قدام شويه هيحتاجوا رعايه ومش هيكون في حد غيري يخدمهم

يلا اهو الواحد يكسب فيهم ثواب بدل ما يروحوا دار مسنين

الخيال

بمعنى ان خيالنا بيكون واسع اوي زياده عن اللزوم

يعني لما نقرأ موضوع عن واحده خطيبها جابلها هديه تلاقينا على طول وبدون مقدمات مخنا سرح في اننا مخطوبين وخطابنا بيجبولنا هدايا

حتى لما بنقرأ موضوع ان واحده جوزها ضربها تلاقونيا بردوا بنتخيل اننا متجوين وأجوازنا بيضربونا ومجرجرينا من شعرنا وبنقول من جوايا 

امتى بقى يحصل ده

أي خيال وخلاص المهم اننا نتجوز
 
لكن البنات الوحشيين خالص اللي اتجوزوا بدري بردوا بيتخيلوا

 لكن بكوابيس وعفاريت

الإبداع

من كتر الفراغ اللي احنا فيه تلاقينا مبدعين في حاجات كتيره

النت
بقينا خبره فيه

ما احنا قاعدين ليل ونهار قدامه


الكتابه

طبعا انا فاضيه ومخي مفيهوش حاجه فبكتب اي حاجه في اي حاجه

الابداع ده مش هتلاقوه غير عندنا وبس وحصري

لكن البنات الوحشيين خالص اللي اتجوزوا بدري تلاقوهم معندهمش وقت يسرحوا شعرهم

يااااااااااااااااااااي سوفااااااااج




سطح الآمال بلا حدود
 
ده طبعاً عندنا
 
دايما امالنا بلا حدود
 
بنتمنى حاجات كتيره اوي وبيكون عندنا امل للأحسن

مثلا واحده باباها رافض تلبس النقاب تلاقيها بتتمنى من جواها انها تتجوز واحد يوافق تلبس النقاب

واحده شافت حاجه حلوه بتتمنى تجيبها وهكذا

لكن البنات الوحشيين خالص اللي اتجوزوا بدري لو جوزها رافض حاجه هى عايزاها 

هتتمنى ايه غير امنيه من امنيتين مفيش غيرهم

يا تموت وترتاح

يا تقتله وترتاح بردوا

الناحيه الدينيه
 
النقطه دي مش بهزر فيها فعلا بتكلم بجد ولله الحمد
هقولكم ازاي

تلاقينا كلنا الحمد لله بنستغفر ربنا كتير عملا بالآيه

(فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا )
 
بنقرأ قرآن كتير بردوا ويمكن انا لو قلت مثلا ان ختم القرآن يوميا هيجيب عريس هتلاقينا كلنا بنختمه مفيش مشكله المهم يجيي العريس
 
الدعاء والتقرب الى الله بالاعمال سواء ببر الوالدين او بالصدقات او او ............

يمكن الناحيه دي بالذات انا بدعي ربنا ان لو كان ليا نصيب واتجوزت افضل عليها ومقلش منها

 
شفتوا بقى فوائد تأخر الجواز بطلوا بقى تحسدوناااااااااااااااااااااااااااا يا وحشين