في يوم شفت واحد مهموم

بيحكي حكاية قلب مظلوم

سألته إيه حكايتك ؟

وإيه قصتك وروايتك ؟

قاللي هحكيلك في سطور

وهقولك عن إيه حكايتي بتدور

دي حكايه قلبين حبيبين

دخلوا دنيا العاشقين

كان لقائهم من غير ميعاد

وبقى بينهم حب ووداد

حبوا بعض وطاروا في الهوا

وإتعاهدوا يكون ما بينهم وفا

وشوقهم وصل لحد السما

لكن قلب منهم خان التاني

وطلع في حبه غدار وأناني

سألته والقلب التاني ؟

قاللي مسكين

عايش في الدنيا تايه وحزين

من يومها لا حد بيشوفه

ولا حد حتى بيلمح طيفه

قولتله خدني أشوفه وأرضيه

ويمكن كلامي يخفف ما بيه

وأخدني وروحنا ونادينا عليه

وجاوبنا والحزن بان في عينيه

سيبوني وإمشوا وإرحلوا

وإوعوا تاني عني تسألوا

سيبوني وإبعدوا وإنسوني

وزي ما باعني بيعوني

ومشيت ودموعي في عينيا

وسؤال كان دايماَ بيحوم حواليا

ليه قلبي مش حاسه بيه ؟

وليه مش شايفاه جوايا ليه ؟

وقبل ما أمشي بعيد

لقيت صوت القلب من جديد

لقيته بينده عليا

ويقولي رايحه فين إستني شويه

خديني وخبيني

وإوعي تاني تسيبيني

لقلب أناني يجرحني

ولدنيا غداره تدبحني

وأخدته وخبيته

وعن عيون الكل داريته

هنعيش أنا وهو لوحدينا

وهنمسح دموعنا بإيدينا

وده كان قلبي ودي كانت حكايتي

وقصتي في دنيا العشق وروايتي

 وقبل ما أنهي بقول لكل حبيبين  

اللي في دنيا العشق ماشيين

اللي يحب لازم يسعد حبيبه

وفي دنيا السعاده لازم يسيبه

ولو حبيب مش هيقدر يسعد حبيب

 لازم يمشي عنه ويغيب

قبل ما قلبه يتعلق بيه

وروحه يحس إنها في إيديه

انا لقيت قلبي وصالحته

واللي ظلمني خلاص سامحته

لكن في عاشقيين مساكيين

لغايه دلوقتي مش لاقيين

قلوبهم وعن بعض تايهيين

وفي النهايه بتمنى لكل إتنين

في دنيا الحب عايشين

يعيشوا هناك مرتاحين

ويكون ما بينهم ود ووئام

ويطير حواليهم حمام السلام

ويدعولي دايماً بحسن الختام 



بقلمي
السلام عليكم ورحمة الله وبركاته

زي ما إنتم شايفين قالب المدونه إتغير

القالب هديه من أخى الكريم رامي (ذئب الظلام ) صاحب مدونة ذئب الظلام

انا بشكره جداً على القالب الرقيق ده وعلى اللفته الكريمه دي منه

اشكرك يا رامي جداً




نيجي بقى للبوست 


البوست ده كتبته لما محمد صاحب مدونة رحلة الحياه كتب موضوع عن العنوسه واسباب تأخر الزواج وانا طلبت منه إننا بلاش نقول عانس ونبدلها بغير متزوجه

وهو مشكور وافق على طلبي 


وهدفي من البوست إني اقول للناس إن الزواج قسمه ونصيب 

يعني بلاش نعيب على البنات ونقول إنهم بيتشرطوا في مواصفات العريس

وبردوا مش بعيب على الرجال واقول إنهم كلهم وحشيين

لكن بقول إن في الأول والأخر كله قسمه ونصيب 


بلاش تقولوا عانس 


بيقولوا علينا عانس

وده كلام خطير

محدش بينا حاسس

بهمنا الكبير 

تعالوا نتكلم بصراحه

وبلاش نخليها حرب

ونتناقش براحه

من غير زعيق ولا ضرب

عشان تسيبوني في حالي

أروح أتجوز وخلاص

و حتى لو مين جالي

أعيش من غير إحساس

وأوافق على أي حد

ومش مهم هو مين

وأحلامي معاه تنهد

وأتطلق بعد يومين

ولا أتجوز بخيل

وأعيش معاه بخساره 

يخلي نهاري ليل

ويديني بالقطاره

ولا اللي ماشي بشورتها

 ودول بقى ياما

عشان بحبك يقولها

ياخد الإذن من ماما

دا غير اللي قاسي قلبه

ميعرفش يعني إيه حب

ينسى إني بحبه

معندوش غير الضرب

ومش كل الرجاله وحشيين

عشان منظلمش حد

في منهم كويسين

رجاله فعلاً بجد

بس مش معقول

هروح أنزل إعلان

وأصرخ فيه وأقول 

عايزه أتجوز إنسان

إنسان بأخلاقه ودينه

يملى الدنيا عليا

يشيلني جوا عينه

ويراعي ربنا فيا

  دا كل شئ محسوب

والجواز مش بإيدينا

دا زي الرزق مكتوب

وكل شئ حوالينا

يا ناس فضوها حكايه

وبلاش بقى تجرحونا

كفايه ظلم كفايه

وخلاص تعالوا إسمعونا

بنرفض تقولوا علينا

عوانس لأنه عيب

كده بتغلطوا فينا

دا كله قسمه ونصيب


بقلمي

اول واجب 



واجب من حبيبتي جايدا العزيزي صاحبة مدونة جايدا العزيزي


تعريف مختصر بالمدونه


انسانه عاديه جداً فوق ما تتصوروا 

اما بياناتي الشخصيه فأختصرها لأني قلتها قبل كده في كرسي الإعتراف


الاسم ولاء 

السن 32

الحاله الاجتماعيه انسه 

 مكانته العلمية والدراسية التى وصل اليها والتى من خلالها يستطيع أن يقدم خدماته للمجتمع

حاصله على دكتوراه الفلسفه في العلوم تخصص كيمياء عضويه 

اما بالنسبه للي اقدر اقدمه للمجتمع من خلال دراستي 

بحكم عملي كل ابحاثي بتنحصر في تحضير مركبات كيميائيه جديده لعلاج بعض الامراض 

والحمد لله في منهم نتائجهم كانت مبشره وخصوصا لعلاج سرطان الكبد

ومنتظره موافقة براءة الاختراع من اكاديمية البحث العلمي والتكنولوجي على المركبات دي 


لكن انتوا عارفين الروتين اللي في بلدنا


مفيش حل غير الإنتظار لسنين عشان نقدر نفكر في تسويق المركبات دي 



متى كانت البداية فى التدوين (بالتاريخ )

مايو 2008 بمدونة دمعة حنين

كيف كانت البداية فى التدوين؟


لما كتبت خاطره إلى من جرحني وبدأت ارسلها لمجموعات بريديه عرفت وقتها ان في حاجه اسمها مدونات 
حبيت ان اعمل مدونه اكتب فيها كل الحاجات اللي بكتبها وخصوصاً إني مبحبش الكتابه على الورق 


ليه أنا مدونة ؟


انا مش بعتبر نفسي مدونه لكن انا بكتب وخلاص 

لكن استمراري في المدونات عشان اعرف معلومات جديده من خلال المدونات اللي بدخلها وتكوين صداقات اعتز بيها جدا 


وما هى طموحاتك فى هذا المجال؟

بالنسبه لمدونتي مفيش لي اي طموح وخصوصاً اني عارفه إن في يوم هيجي وهقفل المدونه بشكل نهائي بس الله العلم إمتى

اما بالنسبه للمدونات الأخري

بجد نفسي القصص اللي بتتكتب فيها تتعمل مسلسل

انا بحب القصص اوي وشفت منكم ناس موهوبين في كتابة القصص وشايفه انه خساره انها تكون قصص على الورق بس 


إلى أي مدى أرغب في التدوين؟
مفيش وقت لان زي ما قلتلكم قبل كده انا بحب اقرأ مواضيعكم عن اني احط مواضيع في مدونتي 
يعني اذا جه يوم وقفلت المدونه هفضل متابعه لمدوناتكم وحتى لو من غير اي تعليقات 


الكتابه عن شئ تحبه 

جميل السؤال ده لاني بعتبره تلبية لدعوة اخي الكريم ماجد القاضي صاحب مدونة هكذا عاملتني الحياه عن الاشياء اللي بنحبها
انا بحب الاطفال اوي
ومهما كنت تعبانه او حزينه مجرد لما العب مع طفل بنسى كل حاجه
بحب اللون الاحمر 
بحب الضحك 
بحب الكتابات الحزينه  بحس انها بتعبر عن جزء في حياة كل انسان مننا


بموت في القصص واللي عايز يكسب صداقتي  يكتبلي قصه على اجزاء 
بحب ماما وبابا واخواتي وعيلتي لانهم ناس طيبه

الواجب التاني 

الواجب ده من أخى الكريم رامي (ذئب الظلام ) صاحب مدونة ذئب الظلام

من ارسل لك الدعوة
أخى الكريم رامي (ذئب الظلام ) صاحب مدونة ذئب الظلام

ما هي المواقع المفضلة لديك و تزورها باستمرار ؟ ضع رابطها و ما تستفيده منها
شوفوا اي موقع خاص بالموبايلات وبرامجها هتلاقوني فيه لأني مدمنة موبايلات وبرامجها

وغيرها من المواقع

بردوا بدخل مواقع خاصه ببرامج الكمبيوتر

.زي

بكده اكون خلصت الواجبات اللي عليا 

ابعت الواجب ده لــــــــ

رحاب صالح صاحبة مدونة حياتي لكن مش حره فيها  


الحسيني صاحب مدونة  desert rose

جميله المصري صاحبة مدونة جميله المصري


احمد شريف صاحب مدونة احمد شريف


أبعث لك برسائل لا يحملها بريد ولا طير

رسائل من قلبي لقلبك ومن جرحه الكبير 
 

رسالة شكر

  على لحظات قضيناها معاً كانت أجمل لحظات عمري 

لحظات حب وسعاده وفرحه

 لحظات تناسيت فيها همومي وأحزاني

ترى أين هذه اللحظات ؟ أذهبت ؟ ام ما زالت بداخلك و داخلي ؟
  

رسالة حب

رساله مزينه بورود زرعناها سوياً 

ورويناها من حبنا وأشواقنا لتنمو بين جدران قلوبنا

رساله بدايتها إلى حبيبي ونهايتها إلى ما كان حبيبي

وما بين السطور كلام لا يفهمه سوانا


رسالة عتاب

 لقلبك الذي هجرني بلا سبب

لقلبك الذي تناسى  ما كان بيننا

وآتسائل أحياناً هل لقلبك الآن حب يحتويه؟؟؟

وهل إمتلكت دقاته إمرأه غيري؟؟؟

إذا كانت إجابتك بنعم ...

فيا لقسوة قلبك البعيد عن عيني القريب من وجداني  


رسالة شوق 

إلى ذكرياتنا الماضيه بكل تفاصيلها

إلى حكايه كتبناها سوياً من عشقنا 
 
إلى أحلامنا التي رسمناها معا
 
آهِ على أحلامنا التي ضاعت بين يديك وعلى يديك

لم يعد لدي سوى حلم نسيانك يراودني كل ليله كالطيف


رسالتي الأخيره رسالة إعتذار

عذراً سيدي فهذه الرساله أبعثها لقلبي

لقلب عشقك لحد الجنون

قلب عاهدك أن لا يخون

قلب إرتويت منه حب وحنان ورويته جراح وآلام

قلب إحتواك بداخله وضاقت عليه مشاعرك وأحاسيسك

عذراً آيها القلب لم يعد للحب بيننا مكان

 فلم يعد لديك غير نسيان الحب اللي كان




 
رساله إليكم

لا تنتظروا منهم أي رسائل 


فمن فارق قلوبكم جفت أقلامه عن الكتابه

بقلمي


السلام عليكم ورحمة الله وبركاته

تم للأسف تدبيسي مره اخرى في كرسي الإعتراف من إختي الحبيبه اسماء عبد العزيز صاحبة مدونه إمنحيني عذراً


إعترافاتي :


1- بعترف إني دكتوره حاصله على دكتوراه الفلسفه في العلوم (تخصص كيمياء عضويه) وإني آنسه وعندي 32 سنه وطبعاً هلاقي علامات إستغراب أوي إني ذكرت سني لكن انا اكتر واحده بتحب تقول سنها لأي حد وبدون خجل وده لسبب إن شكلي صغير اوي وبحب اشوف علامات الإستغراب في عيون اللي بيعرفوا سني الحقيقي وانا عمري ما هنسى إن من تمن شهور بس شافتني واحده كانت اول مره تتعرف عليا  وإفتكرت إني في ثانويه عامه ومتتصوروش ده فرحني قد إيه عشان كده انا مش بخجل إني اقول سني في أي مكان او زمان

2- بعترف إني بحب اللون الاحمر اوي وده واضح في المدونه طبعاً زي ما انتوا شايفين عامله المدونه زي ما يكون عندها الحصبه  ^-^

3- بعترف إني بحب الهزار والضحك اوي  برغم النكد اللي انتوا شايفينه في كتاباتي واني بحب الشقاوه واوقات بحس اني عايزه اطلع الشارع واطنط والعب فيه زي العيال الصغيره بس بيني وبينكم خايفه اعمل كده الاقي شوية عيال ماشيين ورايا وبيقولوا (المجنونه أهي هي المجنونه أهي هي ^-^) 

4- بعترف إني لما عملت مدونة دمعة حنين كان لسببين اولهم إني احفظ كتاباتي وخصوصاً إني لما كنت ببعتها لمجموعات بريديه كنت بلاقي ناس كتير اوي بتاخدها وتنسبها لنفسها فقلت اعمل المدونه كنوع من حفظ الحقوق

السبب التاني إني ألاقي مكان بعيد عن اللي يعرفوني وبعيد عن دكتوره ولاء نفسها اقدر اتكلم فيه براحتي لكن للأسف ومش عارفه إزاي كنت عايزه ده ودخلت باسم دكتوره ولاء صلاح يعني كان ناقص اقول عنواني وأحط صورتي 

الحاجه الأغرب إن بقدرة قادر لقيت العيله كلها بقوا مدونين

يعني بابا فارس الكلمه صاحب مدونة فارس الكلمه

خالو فاروق بن النيل صاحب مدونة عصفور الجنه

اخويا الكبير وسام صاحب مدونة بكل صراحه

اختي الصغيره وداد صاحبة مدونة شوق وحنين

زوجة اخويا وسام توتي سولي صاحبة مدونة عالمي الخاص

بالله عليكم شفتوا حصار زي ده عامله زي ما اكون انا طلعت اهرب منهم لقيتهم ماسكين فيا وبيقولولي نيجي معاكي الله يخليكي ^--^

5- بعترف إني بدأت كتابه من سنتين بس وكان بسبب موضوع معين ويمكن ده واضح في اول حاجه كتبتها وإن حبي للشعر كان من زمان اوي لكن انا مشكلتي اني بتكلم كويس اوي بيني وبين نفسي لكن ككتابه بحس اني عاجزه عن الكلام

6- بعترف إن في فتره بعدت عن المدونه وجالي وقتها حالة نفور منها وبعد فتره قررت افتح مدونة المطبخ لقيت ناس بترجع وترد على دمعة حنين فقلت خلاص هخفي دمعة حنين دي خالص عشان ميكونش في غير مدونة المطبخ لقيت الناس اللي كانت مشاركه في دمعة حنين بيردوا عليها بردوا فقلت خلاص مفيش مفر امري لله هخلي الاتنين وخلاص

7- بعترف إني مبعرفش اكتب لا شعر ولا خواطر لكن كل اللي بتشوفوه مجرد احساس بيجيلي وبترجمه على السطور لكن عمري ما اعتبرت نفسي من الناس اللي عندهم الموهبه دي عشان كده بتمنى انكم تعذروني في ردودي لان بيكون في جوايا كلام كتير اوي عايزه اكتبه كتعليق لموضوعاتكم لكن للأسف مش بعرف اعبر عنه

8- بعترف إني بكره اوي اللي ينسب اي خاطره لنفسه ومتكونش بتاعته - مش عيب إننا ننقل لكن العيب إننا نخلي القارئ يعقتد إننا اللي كاتبين اللي نقلناه - مجرد انك بتنقل شئ جميل ده بيدل على ذوقك وحسك المرهف ومش عيب اننا نكتب تحت اي موضوع مش يخصنا كلمة منقول

9-  بعترف اني مبحبش الظلم وخصوصاً في المشاعر والحب ووقت ما بتظلم بحس ان الدنيا كلها بقت سودا في عينيا

10- بعترف إني مبحبش المشاكل ولا النقاش في اي موضوع للأسف ولا بحب ادخل فيها ويمكن لو قابلتني مشكله او كنت في نقاش وحاولت اوصل رأيي بلاقي صوتي بيروح وعينيا بدمع حتى لو كنت على حق عشان كده بفضل الإنسحاب من اي مشكله حتى لو خسرت

11- بعترف ان في مناطق معينه في حياتي برفض الحديث فيها  نهائياً او مجرد الاشاره اليها في كلامي مع اي شخص مهما كان وإن ده بيبان في كلامي وتعابير وشي على طول لو الشخص ده حاول بس ان يقرب منها

12- بعترف إن اول ما فتحت المدونه كنت بحب اكتب مواضيع فيها عشان اشوف ردود افعال القارئ عليها لكن دلوقتي الموضوع اصبح بالعكس بقيت احب اوي اشوف مواضيع جديده عندكم عشان اتناقش فيها ويمكن ده هتلاحظوه ان ما بين كل موضوع وموضوع عندي بيكون في فتره بينهم وممكن تلاقوني متابعه مدونات اصحابها مبتردش على مواضيعي غير نادراً 

13- بعترف اني بتغاظ اوي من اني الاقي واحد كاتب موضوع للنقاش وتلاقي الزائرين كلهم داخلين متحمسين للنقاش وانا ادخل واتحمس واكتب رد طويل وبعد حوالي خمسين تعليق يدخل صاحب المدونه بكل برود وبأعصاب مش محطوطه في تلاجه لا دي الظاهر نسيها في ديب فريزر ويكتب جمله واحده ( بشكركم كلكم لزيارتكم وتعليقكم ) والله بيتهيألي اني اروحله واخبطه في راسه بأي حاجه واقوله مش قد مواضيع النقاش بتكتبها ليه

14- بعترف اني بموت في الاطفال وان اجمل حاجه في حياتي ولاد اخواتي صلصا (صلاح حوالي 8 سنين ونص ) أول حفيد في أسرتنا وحبيبي اللي بموت في دلعه عليا لانه عارف لو طلب عنيا مش هتأخر عليه  وانوس (انس حوالي 10 شهور ) أخر عنقود الأحفاد لغاية دلوقتي وحبيب قلبي ابو ضحكه زي السكر ودول ولاد اخويا وسام 

ومارو ( مريم حوالي سنتين ونص ) بنت اختي (توأمي) اللي بموت فيها وبعتبرها بنتي وخصوصاً لما تقولي ساعات ماما ولما تدلع و تقولي (إنتي لانا مني لاء ) يعني إنتي زعلانه مني يا ولاء ^-^


15 بعترف اني امنيتي الوحيده حسن الختام وان ربنا يكون راضي عني


16- بعترف ان اللي حواليا بيقولوا عليا طيبه لكن انا مبحبش طيبتي لأن  في ناس بتعتبرها ضعف وان اوقات كتير اوي كنت بتمنى اني اكون زي البنات اللي شخصيتهم قويه اللي ممكن تضرب واحده منهم بسكينه في قلبها تروح مطلعه السكينه وتقولك لو سمحت إتفضل  السكينه بتاعتك واضح انك نسيتها في قلبي 

 17- بعترف إني بحب الوحده اوي وبحب
اوي الجمله دي انا لست وحيده في هذا العالم لكن هناك عالم انا وحدي فيه وان اجمل واسعد لحظات حياتي لما بكون على النت حتى لو مش بعمل حاجه وحاطه السماعه بسمع اناشيد (لاني مبسمعش اغاني ) ساعتها بحس اني منعزله عن العالم الخارجي



18- بعترف اني بحب صورة ملف التعريف بتاعتي اوي وحبيتها اكتر قريب  لما لقيت فيها حاجه بتشبهني ومكنتش واخده بالي منها اول ما اخترتها بس سبحان الله هى جت كده (لو تلاحظوا البنت اللي في الصوره شوله يعني  بتكتب بإيديها الشمال  ) وانا كده ^-^


19- بعترف اني بحاول اوصل إعترافاتي للرقم عشرين لاني مش بحب الأرقام اللي فيها واحد

 20- (وأخيراً رقم عشرين   ^-^  )بعترف اني رغيت معاكم اوي واكيد صدعتكم 



بشكركم على صبركم على قراءة الموضوع 

بمرر الواجب الى :



Ms Venus   صاحبة مدونة  Ms Venus



(ABOALI) صاحب مدونة SHAPE YOUR LIFE

 



 
لو كنت يومها جيت تودعني

كنت شفت في عيوني كلام

كنت هتشتريني مش تبيعني

وماكنش هان عليك الغرام

إستنيتك قلت هترجعلي

ولا عمر ما هتفرقنا الأيام

ناديتك قلت هتسمعني

لكن صوتي رجعلي اوام

بسؤال دايماً بيوجعني

ولا قدرت تجاوبني الأيام

يا تري كنت بتعشقني

وقلبك كان عايش في الهيام

ولا كنت بتخدعني

وحبك كان كله اوهام

من بعدك الفرح ودعني

والنور في عيوني اصبح ظلام

وقلبك لدنيا غريبه رجعني

لا فيها امل ولا فيها احلام

أعيش والحزن يضيعني

واليوم في الحزن اعوام

ولو الدنيا تسمحلي

أدي لقلبك وسام

في قساوته ومين يمنعني

دا الظلم في الحب حرام



بقلمي
السلام عليكم ورحمة الله وبركاته


الواجب ده تم تدبيسي فيه من أخي الكريم ذئب الظلام 


الواجب عباره عن سؤالين 

هل انا فضوليه وهل احب التدخل في شئون الاخرين ؟

ما هي الاسئله التي تستفزني ؟



بالنسبه للسؤال الاول :

هل انا فضوليه وهل احب التدخل في شئون الاخرين ؟

اعتقد إن أفضل إجابه استطيع الحصول عليها لهذا السؤال من الآخرين والمحيطين بي 

لكن سأخرج من نفسي قليلاً لأجاوب كإنسانه غريبه عن نفسي

انا بطبعي لا احب أن يتدخل احد في شئوني ولذلك فأنا احاول ان لا اتدخل في شئون الاخرين

لكن لنتكلم بصراحه فإن معظم النساء عندهم حب الفضول 

واحياناً بلاقي نفسي عندي حب الفضول ده لكن عمري ما بطلب من حد إنه يكلمني عن اي حاجه تخصه إلا إذا هو إتكلم فيها ووقتها بتكلم عادي وبالطبيعي بعرف عنه حاجات 

لكن زي ما قلت مش بطلب ولا بسأل اي حد عن اي شئ يخصه 

اللي عايز يكلمني عن شئونه الخاصه فأهلاً به 

واللي مش عايز بردوا اهلاً به لأن دي حريه شخصيه 

بالنسبه للسؤال الثاني:

ما هي الاسئله التي تستفزني ؟


بصراحه كتير اوي اوي
1- يعني مثلا اكون جايبه هديه لحد ويعجب بيها ويروح على طول سائل هي بكام ويقولي انا بس بسأل عشان عجبتني اوي

يعني هو انا بجيبلك هديه عشان اخد منك حقها >>>> ناس غريبه

2- سؤال تاني لما اكون داخله محل اشتري منه حاجه وأسأل عن تمن اي حاجه عجبتني والاقي اللي بتبيع بتسألني سؤال بايخ اوي ( هو حضرتك هتشتري ؟) يعني ياريتها قالت هو حضرتك هتشتري ده كان معقول شويه لكن السؤال ده فعلاً بينرفزني لسبب إن انا مش من النوع الناس اللي بتحب تلف وتتفرج على الحاجات في المحلات من غير ما تشتري 

يعني لما بدخل اشوف حاجه ببقى خلاص هشتريها 

وطبعاً الاسئله المستفزه كتير اوي في حياتنا لكن كفايه عليكم كده

بمرر الواجب ده إلى 



تامر نبيل صاحب مدونة افكار حره


بوسي صاحبة مدونه ازياء


احمد عاشور صاحب مدونة آفاق طبيه

وداد صاحبة مدونة شوق وحنين
بتسألني إيه هو الفراق وإيه هو معناه؟؟؟

هقولك عنه بإختصار لأني عايشه جواه


ا

آهه تخرج من صدور العاشقين

آهه تحرق قلوب المحبين

آهه تمحي حب السنين

اهة ألم وحزن وآنين 
 

لـ


ليله القمر فيها موجوع

ليله الفرح فيها ممنوع

ليله بكت فيها الشموع

ليله الألم فيها مسموع


فــ

 
فوق السحاب كتبنا محبتنا

فوق الورود رسمنا حكايتنا

فوق الجمر بانت سكتنا 

فوق الشوك ضاعت ضحكتنا


ر

 
راحت ايامنا ولياليها

راحت احلامنا ومعانيها

راحت خطاوينا وعناويها

راحت فرحتنا واغانيها
 

ا

 
انا زي ما انا ومهما يكون

انا زي ما انا قلبي هيصون

انا زي ما انا بحب بجنون

انا زي ما انا وعمري ما هخون  


ق


قلبي مشتاق لهمسك وبينده عليك

قلبي مشتاق لصوتك ولنظرة عينيك

قلبي مشتاق لودك وللمسة ايديك

قلبي مشتاق لحبك وبيحن إليك

     
هو ده الفراق اللي عنه بتتكلم

هو ده الفراق و اللي منه بنتعلم

إن اللي يحب بصدق في النهايه بيتألم


بقلمي
السلام عليكم ورحمة الله وبركاته

يارب تكونوا كلكم بخير

انا كتبت بعض الكلمات وطبعاً يهمني رأيكم فيها 

لكن قبل ما تقرؤها لازم طبعاً اقولكم سبب كتابتي ليها

السبب إن في إنسانه وانا بقول إنسانه لأنها فعلاً إنسانه بطيبتها وأخلاقها


المهم الإنسانه دي مكنش مكتوبلها إنها تتجوز في سن صغير وطبعاً كل اللي يعرفوها كانوا بيدعولها لأنها إنسانه طيبه اوي وأجمل ما فيها إنها كانت بتضحك دايماً 

عمري ما شفتها مكشره لأن جوازها إتأخر بل بالعكس كانت دايماً تضحك وتقول للي يعرفوها انهم يدعولها

وبعدين بعد ما كبرت ربنا رزقها بإنسان وفعلاً إتحقق مش حلمها بس لكن حلم كل اللي يعرفوها

وإتجوزت ولكن بعد شهور يشاء القدر إن زوجها يموت بسبب حادثه 

متتصوروش الكل زعل وحزن عليها قد إيه 

ويمكن انا اول ما عرفت إن زوجها توفى قلت في سري ياااااااااااااااااااه بعد سنين الصبر دي وخلاص يتحقق الحلم في ثانيه كل حاجه تتهد

بجد الله يصبرها ويعوضها خير لطيبتها وصبرها طول السنين 

معلشي طولت عليكم واسيبكم مع الكلمات اللي إتكتبت مخصوص ليها ومعلشي البوست طويل لكن ده إحساسي بعد اللي حصل ليها 


حِلمت تكون عروسه
 
تِلبس فستان وطرحه
 
تمشي ودموعها محبوسه
 
جوا عيونها من الفرحه
 
ومرت عليها السنين
 
والحلم بيزيد جواها
 
وبيكبر جواها الحنين
 
لحلم إتولد وياها
 
وتدعي وبكل حب
 
في كل ساعه ودقيقه
 
تدعي وتقول يارب
 
الحلم يصبح حقيقه
 
وبان حبيبها وظهر
 
وجاب وياه الفرحه
 
وبان وياه القمر
 
شايل بإيده الطرحه
 
وفرحت ونادت وقالت
 
يا حبايبي وأهلي وناسي
 
بعد السنين اللي فاتت
 
صِدق خلاص إحساسي 
 
جالي حبيب أيامي
 
واللي إتمنيته لقيته
 
جالي يحقق أحلامي
 
والحزن خلاص نسيته
 
تعالوا وشوفوا بعنيا

تعالوا وشوفوا السعاده
 
دي قد الدنيا ديا
 
لا أكبر منها وزياده
 
هنروح نشتري الشبكه
 
والفرحه ماليه عنينا
 
نشتري خاتم ودبله
 
عليها حروف أسامينا
 
ونفرش شقتنا بإيدينا
 
نفرشها بأجمل ألوان
 
نفرشها بأحلامنا وأمانينا 
 
وتطلع أجمل بستان
 
ونشوف أوضه لأطفالنا
 
ونفكر و نختار  ليهم
 
اسامي حلوه بأفكارنا
 
وتكون  لايئه عليهم
 
ويوم الحنه يجولي
 
كل بنات العيله
 
يباركولي ويغنولي
 
عروستنا حلوه جميله

والبنات يجوا حواليا
 
و يقرصوني في ركبتي
 
عشان يتجوزوا بعديا 
 
ويحصلوني في جمعتي
 
وفي الكوشه نقعد سوا
 
ونرقص مع بعض كمان
 
ويرقص ويانا الهوا
 
ويعزف أجمل ألحان
 
خلاص يا حزن إسمعنا
 
إنسانا وإنسى عناوينا
 
ده شرع ربنا جمعنا 
 
انا وحبيبي لوحدينا
 
ومرت شهور بسيطه
 
والحب اصبح كبير
 
عروستنا فرحانه وسعيده
 
زي الفراشه بتطير
 
بس يا خساره وغريبه
 
الحلم أصبح قصير
 
في دنيا غداره و عجيبه
 
في ثانيه ممكن تتغير
 
وحلم السنين اللي كان
 
في إيد عروستنا ملموس
 
إتلون بلون أحزان
 
وفي ثانيه أصبح كابوس
 
ومات حبيب السنين
 
وفي لحظه غاب وراح
 
وفات جواها الآنين
 
وحزن ويا الجراح
 
يارب قوّيها وصبرها
 
دا فراق الحبيب عذاب
 
وبالجنه بشرها
 
تدخل من غير حساب
 
يارب يا معين
 
جمّع بينهم في الجنه
 
دي صِبرت طول السنين

تحلم وتدعي وتتمنى
 
يا دنيا خِلص الكلام
 
وأمري معاكي إتحيّر
 
الحزن فيكي أعوام
 
والفرح وياكي قصير
 
يا دنيا بحرك غويط
 
وأحلامنا بتغرق معاه
 
دي حِلمت حلم بسيط
 
لا حِلمت بمال ولا جاه
 
دي حِلمت تكون عروسه
 
وتلبس فستان وطرحه
 
تمشي ودموعها محبوسه
 
جوا عيونها من الفرحه


تمت بقلمي الحزين