السلام عليكم ورحمة الله وبركاته
تم للأسف تدبيسي مره اخرى في كرسي الإعتراف من إختي الحبيبه اسماء عبد العزيز صاحبة مدونه إمنحيني عذراً
إعترافاتي :
1- بعترف إني دكتوره حاصله على دكتوراه الفلسفه في العلوم (تخصص كيمياء عضويه) وإني آنسه وعندي 32 سنه وطبعاً هلاقي علامات إستغراب أوي إني ذكرت سني لكن انا اكتر واحده بتحب تقول سنها لأي حد وبدون خجل وده لسبب إن شكلي صغير اوي وبحب اشوف علامات الإستغراب في عيون اللي بيعرفوا سني الحقيقي وانا عمري ما هنسى إن من تمن شهور بس شافتني واحده كانت اول مره تتعرف عليا وإفتكرت إني في ثانويه عامه ومتتصوروش ده فرحني قد إيه عشان كده انا مش بخجل إني اقول سني في أي مكان او زمان
2- بعترف إني بحب اللون الاحمر اوي وده واضح في المدونه طبعاً زي ما انتوا شايفين عامله المدونه زي ما يكون عندها الحصبه ^-^
3- بعترف إني بحب الهزار والضحك اوي برغم النكد اللي انتوا شايفينه في كتاباتي واني بحب الشقاوه واوقات بحس اني عايزه اطلع الشارع واطنط والعب فيه زي العيال الصغيره بس بيني وبينكم خايفه اعمل كده الاقي شوية عيال ماشيين ورايا وبيقولوا (المجنونه أهي هي المجنونه أهي هي ^-^)
4- بعترف إني لما عملت مدونة دمعة حنين كان لسببين اولهم إني احفظ كتاباتي وخصوصاً إني لما كنت ببعتها لمجموعات بريديه كنت بلاقي ناس كتير اوي بتاخدها وتنسبها لنفسها فقلت اعمل المدونه كنوع من حفظ الحقوق
السبب التاني إني ألاقي مكان بعيد عن اللي يعرفوني وبعيد عن دكتوره ولاء نفسها اقدر اتكلم فيه براحتي لكن للأسف ومش عارفه إزاي كنت عايزه ده ودخلت باسم دكتوره ولاء صلاح يعني كان ناقص اقول عنواني وأحط صورتي
الحاجه الأغرب إن بقدرة قادر لقيت العيله كلها بقوا مدونين
يعني بابا فارس الكلمه صاحب مدونة فارس الكلمه
خالو فاروق بن النيل صاحب مدونة عصفور الجنه
اخويا الكبير وسام صاحب مدونة بكل صراحه
اختي الصغيره وداد صاحبة مدونة شوق وحنين
زوجة اخويا وسام توتي سولي صاحبة مدونة عالمي الخاص
بالله عليكم شفتوا حصار زي ده عامله زي ما اكون انا طلعت اهرب منهم لقيتهم ماسكين فيا وبيقولولي نيجي معاكي الله يخليكي ^--^
5- بعترف إني بدأت كتابه من سنتين بس وكان بسبب موضوع معين ويمكن ده واضح في اول حاجه كتبتها وإن حبي للشعر كان من زمان اوي لكن انا مشكلتي اني بتكلم كويس اوي بيني وبين نفسي لكن ككتابه بحس اني عاجزه عن الكلام
6- بعترف إن في فتره بعدت عن المدونه وجالي وقتها حالة نفور منها وبعد فتره قررت افتح مدونة المطبخ لقيت ناس بترجع وترد على دمعة حنين فقلت خلاص هخفي دمعة حنين دي خالص عشان ميكونش في غير مدونة المطبخ لقيت الناس اللي كانت مشاركه في دمعة حنين بيردوا عليها بردوا فقلت خلاص مفيش مفر امري لله هخلي الاتنين وخلاص
7- بعترف إني مبعرفش اكتب لا شعر ولا خواطر لكن كل اللي بتشوفوه مجرد احساس بيجيلي وبترجمه على السطور لكن عمري ما اعتبرت نفسي من الناس اللي عندهم الموهبه دي عشان كده بتمنى انكم تعذروني في ردودي لان بيكون في جوايا كلام كتير اوي عايزه اكتبه كتعليق لموضوعاتكم لكن للأسف مش بعرف اعبر عنه
8- بعترف إني بكره اوي اللي ينسب اي خاطره لنفسه ومتكونش بتاعته - مش عيب إننا ننقل لكن العيب إننا نخلي القارئ يعقتد إننا اللي كاتبين اللي نقلناه - مجرد انك بتنقل شئ جميل ده بيدل على ذوقك وحسك المرهف ومش عيب اننا نكتب تحت اي موضوع مش يخصنا كلمة منقول
9- بعترف اني مبحبش الظلم وخصوصاً في المشاعر والحب ووقت ما بتظلم بحس ان الدنيا كلها بقت سودا في عينيا
10- بعترف إني مبحبش المشاكل ولا النقاش في اي موضوع للأسف ولا بحب ادخل فيها ويمكن لو قابلتني مشكله او كنت في نقاش وحاولت اوصل رأيي بلاقي صوتي بيروح وعينيا بدمع حتى لو كنت على حق عشان كده بفضل الإنسحاب من اي مشكله حتى لو خسرت
11- بعترف ان في مناطق معينه في حياتي برفض الحديث فيها نهائياً او مجرد الاشاره اليها في كلامي مع اي شخص مهما كان وإن ده بيبان في كلامي وتعابير وشي على طول لو الشخص ده حاول بس ان يقرب منها
12- بعترف إن اول ما فتحت المدونه كنت بحب اكتب مواضيع فيها عشان اشوف ردود افعال القارئ عليها لكن دلوقتي الموضوع اصبح بالعكس بقيت احب اوي اشوف مواضيع جديده عندكم عشان اتناقش فيها ويمكن ده هتلاحظوه ان ما بين كل موضوع وموضوع عندي بيكون في فتره بينهم وممكن تلاقوني متابعه مدونات اصحابها مبتردش على مواضيعي غير نادراً
13- بعترف اني بتغاظ اوي من اني الاقي واحد كاتب موضوع للنقاش وتلاقي الزائرين كلهم داخلين متحمسين للنقاش وانا ادخل واتحمس واكتب رد طويل وبعد حوالي خمسين تعليق يدخل صاحب المدونه بكل برود وبأعصاب مش محطوطه في تلاجه لا دي الظاهر نسيها في ديب فريزر ويكتب جمله واحده ( بشكركم كلكم لزيارتكم وتعليقكم ) والله بيتهيألي اني اروحله واخبطه في راسه بأي حاجه واقوله مش قد مواضيع النقاش بتكتبها ليه
14- بعترف اني بموت في الاطفال وان اجمل حاجه في حياتي ولاد اخواتي صلصا (صلاح حوالي 8 سنين ونص ) أول حفيد في أسرتنا وحبيبي اللي بموت في دلعه عليا لانه عارف لو طلب عنيا مش هتأخر عليه وانوس (انس حوالي 10 شهور ) أخر عنقود الأحفاد لغاية دلوقتي وحبيب قلبي ابو ضحكه زي السكر ودول ولاد اخويا وسام
ومارو ( مريم حوالي سنتين ونص ) بنت اختي (توأمي) اللي بموت فيها وبعتبرها بنتي وخصوصاً لما تقولي ساعات ماما ولما تدلع و تقولي (إنتي لانا مني لاء ) يعني إنتي زعلانه مني يا ولاء ^-^
15 بعترف اني امنيتي الوحيده حسن الختام وان ربنا يكون راضي عني
16- بعترف ان اللي حواليا بيقولوا عليا طيبه لكن انا مبحبش طيبتي لأن في ناس بتعتبرها ضعف وان اوقات كتير اوي كنت بتمنى اني اكون زي البنات اللي شخصيتهم قويه اللي ممكن تضرب واحده منهم بسكينه في قلبها تروح مطلعه السكينه وتقولك لو سمحت إتفضل السكينه بتاعتك واضح انك نسيتها في قلبي
17- بعترف إني بحب الوحده اوي وبحب اوي الجمله دي انا لست وحيده في هذا العالم لكن هناك عالم انا وحدي فيه وان اجمل واسعد لحظات حياتي لما بكون على النت حتى لو مش بعمل حاجه وحاطه السماعه بسمع اناشيد (لاني مبسمعش اغاني ) ساعتها بحس اني منعزله عن العالم الخارجي
18- بعترف اني بحب صورة ملف التعريف بتاعتي اوي وحبيتها اكتر قريب لما لقيت فيها حاجه بتشبهني ومكنتش واخده بالي منها اول ما اخترتها بس سبحان الله هى جت كده (لو تلاحظوا البنت اللي في الصوره شوله يعني بتكتب بإيديها الشمال ) وانا كده ^-^
19- بعترف اني بحاول اوصل إعترافاتي للرقم عشرين لاني مش بحب الأرقام اللي فيها واحد
20- (وأخيراً رقم عشرين ^-^ )بعترف اني رغيت معاكم اوي واكيد صدعتكم
بشكركم على صبركم على قراءة الموضوع
بمرر الواجب الى :
Ms Venus صاحبة مدونة Ms Venus
